Sipas raportit të Policisë së Kosovës, tre raste të dhunës në familje janë raportuar në rajonin e Pejës dhe në Klinë në periudhën 1‑2 nëntor, ku të gjitha viktimat janë gra kosovare.
Rasti i parë është regjistruar më 1 nëntor, rreth orës 14:00, në Pejë. Një grua ka njoftuar se është sulmuar fizikisht nga një person. Viktima ka marrë trajtim mjekësor, ndërsa i dyshuari është aktualisht në kërkim policor.
Rasti i dytë, i regjistruar në të njëjtën ditë, rreth orës 15:55 në Pejë, ka sjellë arrestimin e një personi në dyshim për kanosje dhe ushtrim të dhunës ndaj një gruaje. Pas intervistimit, prokurori ka vendosur dërgimin e të dyshuarit në mbajtje.
Rasti i tretë është njoftuar më 2 nëntor, rreth orës 14:45, në Klinë. Personi i dyshuar është arrestuar dhe, pas intervistimit, ka qenë dërguar në mbajtje sipas vendimit të prokurorit. Të tre rastet po trajtohen nga organet kompetente.
