Agjencia e Ushqimit dhe Veterinarisë ka ndaluar futjen e një sasie prej 1.068 kilogramësh patatina në pikën kufitare, pasi analizat kanë treguar prani të akrilamidit mbi normat e lejuara.
Sipas autoriteteve, ngarkesa me emrin e produktit “STIZA Potato Chips Paprika” dhe me numër loti 909073 ishte importuar nga kompania “BEST BT SH.P.K.” me seli në Prizren. Pas testimit të mostrave në laborator, Inspektorati Fitosanitar Kufitar ka lëshuar vendimin për ndalimin e hyrjes dhe kthimin mbrapsht të mallit, duke penguar kështu daljen e tij në tregun vendor.
Akrilamidi përbën një përbërës kimik që krijohet gjatë përgatitjes së ushqimeve me niseshte në temperatura të larta, si gjatë skuqjes apo pjekjes. Autoriteti Evropian për Sigurinë Ushqimore ka theksuar se konsumimi afatgjatë i kësaj substance përbën rrezik për shëndetin e njerëzve për shkak të vetive të mundshme kancerogjene.
Inspektorati ka bërë të ditur se masa ndaluese përfshin vetëm këtë ngarkesë specifike të identifikuar, ndërsa procesi i kontrolleve rigoroze në kufi do të vazhdojë rregullisht për të mbrojtur konsumatorët nga produktet që nuk plotësojnë standardet e sigurisë.
