Eksperti i ekonomisë, Safet Gërxhaliu, ka vlerësuar se projektbuxheti i Kosovës për vitin 2027 prej 4.27 miliardë eurosh nuk tregon domosdo një zhvillim real ekonomik. Sipas tij, shtimi prej rreth 300 milionë eurosh krahasuar me vitin paraprak vjen kryesisht si pasojë e normës së inflacionit prej 7.8 për qind, e cila kap shifrën e rreth 311 milionë eurove.
Gërxhaliu ka theksuar se shtetit i duhet një rritje substanciale që përmirëson mirëqenien e qytetarëve, e jo vetëm një rritje numerike e bazuar në lëvizjet inflatore. Ai ka shtuar se çdo plan buxhetor duhet të shoqërohet me dokumente strategjike të qarta për të dëshmuar se ku shkojnë investimet dhe cilat janë përfitimet publike.
Duke analizuar ndarjen e mjeteve financiare, ai vërejti se zërat kryesorë shkojnë te subvencionet, transferet dhe shpenzimet e zakonshme, ndërsa investimet kapitale dhe mallrat zënë pjesën tjetër. Kjo strukturë, sipas tij, dëshmon se buxheti është më shumë i orientuar drejt mbështetjes sociale dhe mbijetesës sesa drejt qëndrueshmërisë dhe zhvillimit afatgjatë ekonomik.
