Deputeti Eman Rrahmani ka bërë thirrje për largimin nga detyra të zyrtarëve përgjegjës lidhur me dështimet e institucioneve në rastin e vrasjes së Arlinda Zekajt.
Sipas tij, mundësia për të marrë përgjegjësi morale nëpërmjet dorëheqjeve tashmë ka kaluar dhe tani kërkohen veprime konkrete. Në paraqitjen e tij në emisionin “Debat Plus”, ai theksoi se vendimmarrja për shkarkime duhet të vijë drejtpërdrejt nga kryeministri.
Rrahmani, i cili merr pjesë në Komisionin Hetimor parlamentar për këtë ngjarje, kërkoi një verifikim të gjerë mbi mënyrën se si po funksionon i gjithë zinxhiri institucional në vend.
Ai po ashtu shprehu kritika ndaj qeverisë aktuale për qasjen ndaj rasteve të dhunës në familje dhe vrasjeve. Deputeti pretendoi se gjatë periudhës prej gati shtatë vitesh të këtij pushteti ka pasur një shtim të këtyre ngjarjeve, gjë që sipas tij lidhet me dobësitë në sistem.
Në fund, Rrahmani nënvizoi se kërkimi i llogarisë nuk duhet të mbetet vetëm te personat e përfshirë drejtpërdrejt në rastin e Zekajt, por duhet të shtrihet në funksionimin e përgjithshëm të institucioneve.
