Kreu i Partisë Demokratike, Sali Berisha, ka drejtuar akuza të rënda ndaj drejtuesit të Prokurorisë së Posaçme, Altin Dumani, si dhe institucionit që ai drejton, duke e cilësuar atë si një organ që ka amnistuar shkeljet në proceset zgjedhore.
Pas paraqitjes së tij në ambientet e këtij institucioni në kuadër të masës së sigurisë me detyrim paraqitjeje, Berisha u ndal te çështja e krimeve zgjedhore. Sipas tij, raportet e organizatave ndërkombëtare dëshmojnë bashkimin e strukturave shtetërore me ato partiake gjatë zgjedhjeve, ndërsa akuzoi Prokurorinë e Posaçme se nuk ka ndërmarrë hapat e duhur hetimor për këtë dukuri.
Gjatë fjalës së tij para gazetarëve, ai përdori gjuhë të ashpër kritike ndaj funksionimit të organeve të drejtësisë, duke i quajtur ato pjesë të strukturave vendimmarrëse të vendit, dhe theksoi se qëndrimet e tij ndaj këtij institucioni do të vijojnë të jenë të pandryshuara.
