Gjatë gjykimit në Londër, prokuroria ka pohuar se vrasja e shqiptarit 22-vjeçar Lorik Abazi në Croydon ka nisur nga një koment që dyshohet se i është bërë partneres së të akuzuarit.
Procesi zhvillohet në gjykatën “Old Bailey”, ku po shqyrtohen rrethanat e krimit. Sipas mediave britanike, ngjarja ndodhi në orët e para të 15 shkurtit. Para kësaj, Abazi e kishte kaluar mbrëmjen e Shën Valentinit me partneren dhe me miq në një sallë bowlingu.
Prokuroria pretendon se i akuzuari, Ellis Anim-Annor, u kthye pasi u largua nga lokali që të përballej me grupin e të rinjve. Konflikti përfundoi me përdorimin e thikave. Abazi pësoi plagë të rënda dhe ndërroi jetë në spital.
Në sulm u plagosën edhe dy të rinj të tjerë, të dy 21-vjeçarë. Njëri prej tyre ishte në gjendje kritike për jetën.
Anim-Annor i mohon akuzat për vrasje dhe për plagosje me dashje. Gjykimi vazhdon, ndërsa gjykata pritet t’i shqyrtojë provat dhe të përcaktojë përgjegjësinë penale të të akuzuarit.
