Ministri i Punëve të Brendshme, Xhelal Sveçla, ka njoftuar se 11 zyrtarë policorë janë suspenduar, pasi raporti për punën e Policisë së Kosovës në rastin e Arlinda Zekajt ka evidentuar shkelje serioze. Zekaja u vra më 25 tetor.
Sipas ministrit, Inspektorati Policor i Kosovës ka verifikuar të gjitha veprimet dhe mosveprimet e Policisë. Raportin ia ka dorëzuar një ditë më parë kryeministrit Albin Kurti. Ai tha se kontrollet e 72 orëve të fundit kanë vërtetuar shqetësimet e ngritura më herët: dështime në trajtimin e raportimeve dhe në përmbushjen e detyrave institucionale për mbrojtjen e jetës së Zekajt.
Mes të suspenduarve janë drejtori rajonal i Policisë në Pejë, shefi i hetimeve rajonale, komandanti dhe zëvendëskomandanti i stacionit policor në Pejë, shefi i sektorit të hetimeve dhe shefi i sektorit të operativës në po atë stacion. Suspendimi prek edhe komandantin e nënstacionit policor në Vitomiricë dhe katër hetues të stacionit në Pejë.
Sveçla tha se raporti evidenton shkelje nga disa zyrtarë policorë dhe nga pjesëtarë të zinxhirit komandues në Pejë. Gjetjet pritet t’i shqyrtojë edhe prokuroria.
Shkeljet e identifikuara janë moszbatimi i urdhrit të parë të mbrojtjes dhe vonesa në ekzekutimin e të dytit. Po ashtu, nuk është marrë parasysh kërkesa për rivlerësim të rrezikut dhe nuk janë ndërmarrë masat e nevojshme për shtimin e kapaciteteve policore, me qëllim të sigurisë së saj. Ministri shtoi se hetimet e mëtejshme mund të nxjerrin në pah fakte dhe përgjegjësi të tjera.
Ai theksoi se suspendimi nuk është përfundim i procesit. Sipas tij, nevojitet hetim i plotë dhe përgjegjësi para ligjit për të gjithë ata që kanë neglizhuar raportimet dhe paralajmërimet e viktimës.
