Vetëm një ditë para zgjedhjeve të mesit të mandatit në Shtetet e Bashkuara, hulumtimet e fundit të opinionit publik tregojnë për një përmbysje të mundshme në disa prej rajoneve që janë konsideruar prej dekadash si baza të sigurta për republikanët. Sipas të dhënave nga New York Times dhe Universiteti i Sienës, kandidatët demografë po shënojnë epërsi në shtete si Teksasi dhe Kansasi.
Në Teksas, ku nuk është zgjedhur asnjë senator demokrat prej vitit 1988, dhe në Kansas, ku nuk është regjistruar asnjë fitore demokrate që nga viti 1932, përfaqësuesit e kësaj partie duket se janë përpara në matjet e fundit. Në total, demokratët kryesojnë në gjashtë nga shtatë shtetet e anketuara, ndërsa Iowa mbetet në barazim. Këto zhvillime mund të ndikojnë drejtpërdrejt në përcaktimin e kontrollit të Senatit.
Analistët vlerësojnë se rritja e mbështetjes për demokratët lidhet kryesisht me pakënaqësinë e qytetarëve ndaj qeverisjes aktuale dhe menaxhimit të ekonomisë, veçanërisht sa i përket kostos së jetesës. Performanca e presidentit amerikan miratohet nga një përqindje e ulët e votuesve në këto shtete, ndërkohë që shqetësimet për çmimet dhe tarifat e importit kanë ndikuar te zhgënjimi i një pjese të elektoratit tradicional konservator.
Megjithatë, sondazhet nxjerrin në pah edhe disa sfida për demokratët, pasi një numër i konsiderueshëm votuesish mbeten të pavendosur, ndërsa ata që kanë vendosur opinionin e tyre në muajin e fundit priren të mbështesin kandidatët republikanë. Rezultati përfundimtar mbetet për t’u parë në kutitë e votimit.
