Presidenti i Ukrainës, Volodymyr Zelensky, ka arritur të mërkurën në kryeqytetin e Spanjës, në kuadër të një vizite të paraprirë nga masat e fshehtësisë për arsye sigurie. Avioni presidencial u ul në Madrid, ku kreu i shtetit ukrainas pritet të zhvillojë një sërë takimesh me personalitete të larta ndërkombëtare.
Gjatë qëndrimit dyditor, agjenda parashikon pjesëmarrjen e tij në një takim të rëndësishëm të enjten, ku do të marrin pjesë figura të shquara, përfshirë Sekretarin e Përgjithshëm të Kombeve të Bashkuara, António Guterres, dhe Presidentin e Këshillit Evropian, António Costa. Në këtë organizim do të jetë i pranishëm edhe kryeministri spanjoll, Pedro Sánchez, krahas përfaqësuesve të tjerë nga vendet ibero-amerikane.
Krahas këtij takimi të përbashkët, programi përfshin bisedime dypalëshe mes Zelenskyt, kryeministrit Sánchez dhe Mbretit të Spanjës, Felipe VI. Vizita në samitin e Madridit konsiderohet një mundësi strategike për Kievin që të ngushtojë raportet dhe të koordinojë qëndrimet me shtetet e Amerikës Latine, një rajon ku pasojat e ndërhyrjes ushtarake ruse kanë prodhuar perceptime të ndryshme politike. Burimet qeveritare bëjnë me dije se gjatë qëndrimit atje, kreu i Ukrainës do të bisedojë edhe me anëtarë të delegacioneve të ndryshme që marrin pjesë në këtë ngjarje ndërkombëtare.
