Projektligji për buxhetin e vitit 2027 pritet të procedohet shumë shpejt në Kuvendin e Kosovës, duke përfshirë një fond prej një miliard eurosh të destinuar për investime kapitale dhe zhvillim.
Sipas zyrtarëve të lartë të Lëvizjes Vetëvendosje, ky projektbuxhet do të pasqyrojë prioritetet e Qeverisë dhe zotimet e dhëna gjatë fushatës zgjedhore, me theks të veçantë te sektori i mbrojtjes, sigurisë, infrastrukturës, arsimit dhe shëndetësisë.
Gjithashtu, është theksuar nevoja për një planifikim më të qëndrueshëm të projekteve për të shmangur zvarritjet e së kaluarës, të cilat kanë ngadalësuar realizimin e tyre në rrethana reale.
Qeveria e Kosovës pritet të mbajë mbledhjen e radhës për shqyrtimin dhe miratimin e këtij projektbuxheti, ndërkohë që opozita ka ngritur kritika lidhur me respektimin e afateve ligjore për procedimin e tij.
