Policia e Kosovës ka evidentuar disa raste të dhunës në familje në raportin e saj për 24 orët e fundit. Rastet janë regjistruar në Prishtinë, Pejë, Drenas, Obiliq dhe Malishevë.
Shumica e rasteve lidhen me dhunë psikike dhe kanosje ndaj bashkëshortëve, ndërsa është raportuar edhe një rast i dhunës fizike.
Prishtinë: Një grua ka raportuar se për një kohë të gjatë ka përjetuar dhunë psikike nga bashkëshorti, me të cilin nuk jeton bashkë prej disa muajsh. I dyshuari është arrestuar dhe, me vendim të prokurorit, është dërguar në mbajtje.
Në një rast tjetër në kryeqytet, një grua ka raportuar se është kanosur nga ish-bashkëshorti, për të cilin dyshohej se mbante armë zjarri në shtëpi. Policia e ka bastisur shtëpinë me urdhër të prokurorit, por nuk ka gjetur asgjë të dyshimtë. Megjithatë, i dyshuari është arrestuar dhe dërguar në mbajtje.
Edhe në dy raste të tjera në Prishtinë, të dyshuarit për dhunë psikike dhe kanosje ndaj bashkëshorteve janë arrestuar dhe dërguar në mbajtje me vendim të prokurorit. Në një rast tjetër, një burrë dyshohet për dhunë fizike ndaj bashkëshortes. Pas intervistimit, ai është liruar në procedurë të rregullt.
Pejë: Një grua ka thënë se vazhdon të marrë mesazhe nga ish-bashkëshorti, prej të cilit ka frikë. Sipas policisë, çifti është ndarë para disa muajsh dhe ka dy fëmijë, ndërsa procedura e shkurorëzimit zhvillohet në gjykatë. I dyshuari është arrestuar dhe dërguar në mbajtje me vendim të prokurorit.
Drenas dhe Obiliq: Në Drenas është arrestuar një person i dyshuar për kanosje ndaj bashkëshortes dhe është dërguar në mbajtje. Në Obiliq, një grua ka raportuar dhunë psikike nga bashkëshorti, por i dyshuari nuk është gjetur dhe rasti po hetohet.
Malishevë: Policia ka ndërhyrë pas një debati mes nuses dhe vjehrrit. Të përfshirët janë intervistuar dhe, me vendim të prokurorit, janë liruar në procedurë të rregullt.
