Anëtarët e qeverisë federale dhe deputetët e Bundestagut në Gjermani kanë pranuar njoftime paralajmëruese nga kompania Apple, pasi dyshohet se telefonat e tyre inteligjentë mund të jenë vënë në shënjestër të programeve keqdashëse.
Kjo situatë është konfirmuar nga ministri i Çështjeve Digjitale, Karsten Wildberger, i cili ka bërë të ditur se paralajmërimet e para kanë nisur të shfaqen në pajisjet e personave të prekur që prej datës 29 tetor. Sipas dokumenteve nga Zyra Federale për Sigurinë e Informacionit, njoftimet u referohen sulmeve të mundshme përmes softuerëve spiunë mercenarë.
Autoritetet kompetente kanë ndërmarrë hapa të menjëhershëm, duke u dërguar udhëzime zyrtare personave që kanë marrë sinjalizimet mbi mënyrën se si duhet të veprojnë. Megjithatë, autoritetet kanë sqaruar se vetë pranimi i këtij alarmi nuk konfirmon domosdoshmërisht se pajisja është thyer apo se ndonjë sulm ka rezultuar i suksesshëm.
Ekspertët e sigurisë theksojnë se softuerët e tillë të avancuar mund t’u sigurojnë keqbërësve qasje në mesazhe të enkriptuara, thirrje telefonike, të dhëna vendndodhjeje, si dhe mundësi për të aktivizuar nga distanca kamerën ose mikrofonin e pajisjes. Deri më tani, nuk është bërë e ditur se kush mund të qëndrojë pas këtyre tentativave për sulm kibernetik.
