Zëvendëskryeministrja dhe ministrja e Drejtësisë, Donika Gërvalla-Schwarz, së bashku me ministrin e Punëve të Brendshme, Xhelal Sveçla, sot do të flasin para medieve për vrasjen e Arlinda Zekajt.
Konferenca e përbashkët është paralajmëruar për orën 09:00, në ndërtesën e Qeverisë së Kosovës. Ajo mbahet pasi të dyja ministritë i kanë dorëzuar raportet e tyre në Zyrën e Kryeministrit.
Një ditë më parë, Zyra e Kryeministrit Albin Kurti njoftoi se i ka pranuar raportet e detajuara nga dy ministritë. Sipas njoftimit, ato do të shqyrtohen për të përcaktuar se si ka rrjedhur rasti dhe për të parë nëse ka pasur lëshime institucionale, neglizhencë ose mosreagim nga institucionet përgjegjëse.
Shqyrtimi, thuhet në njoftim, do të përfshijë edhe përgjegjësinë institucionale dhe mënyrën se si është trajtuar rasti në të gjitha fazat.
Konferenca mbahet teksa në Prishtinë, për të tretën ditë radhazi, zhvillohen protesta për drejtësi për Arlinda Zekajn dhe për gratë e vrara.
Protestuesit janë organizuar nga Kolektivi për Mendim dhe Veprim Feminist. Ndër kërkesat kryesore të tyre është dorëheqja ose shkarkimi i ministres Gërvalla dhe i ministrit Sveçla.
Ata kërkojnë gjithashtu hetim dhe ndjekje penale për zyrtarët që dyshohet se e kanë neglizhuar rastin e Zekajt, si dhe llogaridhënie për veprimet e mosveprimet e institucioneve përgjegjëse.
