Edhe pse kungujt lidhen ngushtë me festat e muajit tetor dhe dekorimet e ndryshme, vlerat e tyre ushqimore nuk duhet të anashkalohen pasi të kalojë kjo periudhë. Këto perime dhe farat e tyre përbëjnë një burim të rëndësishëm ushqimi që meriton vëmendje gjatë gjithë vitit në tryezat tona.
Mishi portokalli i kungujve karakterizohet nga prania e lartë e karotenoideve, ku beta-karoteni shndërrohet në trup në vitaminë A, duke ndihmuar shikimin, mbrojtjen e lëkurës dhe funksionimin e sistemit imunitar. Ushqimet e pasura me këto pigmente ndihmojnë në zvogëlimin e inflamacionit dhe ulin rrezikun e shfaqjes së sëmundjeve kronike. Po ashtu, prania e vitaminës C dhe potasit ndikon pozitivisht në mbrojtjen e zemrës dhe balancimin e organizmit, ndërsa fibrat ndihmojnë në tretje dhe rregullimin e sheqerit në gjak.
Lloje të ndryshme si Butternut Squash, Kabocha, Crown Prince apo Hokkaido ofrojnë shije të veçanta dhe mund të përgatiten në forma të ndryshme, qoftë të pjekura, në supa apo pure.
Nga ana tjetër, farat e kungullit përmbajnë sasi të mëdha mineralesh si zinku, magnezi dhe seleni, të cilat ndihmojnë imunitetin, shëndetin e zorrëve dhe ekuilibrin hormonal. Ato gjithashtu përmbajnë triptofan, një aminoacid që ndihmon trupin në prodhimin e hormoneve që rregullojnë gjumin dhe humorin.
