Kryeministri Edi Rama ka përsëritur thirrjen për bisedime drejtuar studentëve dhe pedagogëve që vijojnë protestën, duke shprehur gatishmërinë e ekzekutivit për të shqyrtuar kërkesat e tyre dhe për të adresuar shqetësimet e ngritura.
Përmes rrjeteve sociale, kreu i qeverisë ndau pamje nga një sofër guri e vendosur para ndërtesës së Kryeministrisë, mbi të cilën shkruhej fjala “Dialog”, si pjesë e apelit të tij për të nisur negociatat me përfaqësuesit e protestuesve.
Nga ana e tyre, pjesëmarrësit në protestë e kanë hedhur poshtë ftesën, duke kërkuar largimin e kryeministrit nga detyra dhe duke paralajmëruar se tubimet do të vazhdojnë. Ndërkohë, qeveria ka bërë të ditur se po përgatit një paketë masash dhe se buxheti i vitit 2027 do të përfshijë mbështetje shtesë për studentët, familjet dhe shërbimet publike.
