General Alexus G. Grynkewich, Komandanti Suprem i Forcave Aleate të NATO-s në Europë (SACEUR), ka kryer një vizitë zyrtare në Kosovë, ku u prit me nderim nga gjenerali Roberto Vergori, komandanti i misionit KFOR.
Sipas njoftimit të KFOR-it, ky udhëtim rikonfirmon angazhimin e vazhdueshëm të NATO-s për të ruajtur stabilitetin në Kosovë dhe në të gjithë rajonin.
Gjatë takimit, dy gjeneralët kanë diskutuar procesin e optimizimit të misionit KFOR, duke e bazuar në vlerësimin e zhvillimeve pozitive në ambientin e sigurisë. Çdo ndryshim në madhësinë apo përfshirjen e misionit do të zbatohet në mënyrë graduale dhe të kalibruar, në përputhje me vlerësimet e vazhdueshme në terren.
U theksua gjithashtu se këto masa janë të kthyeshme në rast se ndodhin zhvillime serioze që mund të ndikojnë në sigurinë lokale dhe stabilitetin rajonal.
Grynkewich dhe Vergori kanë pasur takime me përfaqësues të institucioneve të Kosovës dhe të Listës Serbe, duke theksuar se siguria e qëndrueshme varet nga zgjidhje politike, dialog gjithëpërfshirës dhe bashkëpunim.
Vizita përfundoi në Manastirin e Graçanicës, ku u takuan me përfaqësues fetarë. KFOR i ka ripohuar mandatin e tij për të garantuar një mjedis të sigurt dhe lirinë e lëvizjes për të gjithë banorët e Kosovës, sipas udhëzimeve të OKB-së.
