Dietat ekstreme dhe metodat e shpejta për të humbur peshë shpesh nuk japin rezultate afatgjata. Në vend të kësaj, ato mund të çojnë në rikthimin e kilogramëve të humbur.
Mjekja dhe nutricionistja María Jose Crispin, nga klinika Clínica Menorca në Madrid, ka veçuar tri gabime të zakonshme që e pengojnë dobësimin e qëndrueshëm.
Gabimi i parë është ndjekja e dietave ekstreme që premtojnë humbje të shpejtë. Sipas Crispin, ato mund të shkaktojnë humbje të masës muskulore dhe të lëngjeve. Kur personi kthehet te ushqyerja e zakonshme, kilogramët mund të rikthehen, ndonjëherë edhe më shumë se më parë. Ajo këshillon krijimin e zakoneve të shëndetshme që mund të ruhen gjatë, në vend të kufizimeve të rrepta.
Gabimi i dytë është përqendrimi vetëm te ushqimi dhe lënia pas dore e aktivitetit fizik. Nutricionistja rekomandon kombinimin e ushtrimeve kardio me stërvitjen e forcës, sepse kjo ndihmon në ruajtjen e muskujve, përmirëson kondicionin dhe mban peshën e arritur.
Gabimi i tretë është heqja e plotë e yndyrave nga ushqimi. Crispin thekson se shtimi në peshë lidhet kryesisht me marrjen e tepërt të kalorive, pavarësisht nëse ato vijnë nga yndyrat, proteinat, karbohidratet apo alkooli.
Ajo rekomandon yndyra të shëndetshme në ushqyerjen e përditshme, si ato që gjenden te salmoni, vaji i ullirit dhe avokadoja. Këshillon kufizimin e yndyrave trans dhe të tepricës së yndyrave të ngopura.
Sipas saj, dobësimi i qëndrueshëm nuk arrihet me uri apo me heqjen e grupeve të tëra ushqimore, por me ushqyerje të ekuilibruar, aktivitet fizik dhe zakone të shëndetshme afatgjata.
