Kryeministri i Maqedonisë së Veriut, Hristijan Mickoski, ka komentuar disfatën e partisë së tij në zgjedhjet për komunën e Bërvenicës. Ai ka deklaruar se formacioni i tij politik ka garuar me një platformë dhe program konkret, derisa pala kundërshtare është mbështetur te nacionalizmi.
Sipas kreut të ekzekutivit, në këtë rezultat zgjedhor kanë ndikuar edhe individë që kanë tërhequr vota fshehurazi, duke aluduar se koalicioni VLEN ka vepruar kundër kandidatit të VMRO-DPMNE-së, linjë kjo e ndjekur edhe nga deklaratat e mëparshme të deputetes Dafina Stojanovska.
Mickoski ka theksuar se pavarësisht rritjes së numrit të votave në krahasim me raundin e parë, ku shifra u ngrit nga 3000 në 4200, si dhe shtimit prej 1300 votash krahasuar me zgjedhjet parlamentare, kjo mbështetje nuk ka mjaftuar për të siguruar fitoren. Ai ka falënderuar të gjithë qytetarët e Bërvenicës për pjesëmarrjen dhe ka shtuar se qeveria do të mbështesë zhvillimin e kësaj zone pa dallim.
