Kim Kardashian dyshohet se ka përjetuar një incident tjetër të frikshëm me armë, këtë herë gjatë një udhëtimi në Ugandë në vitin 2018. Ngjarja ka ndodhur dy vjet pasi ajo ishte grabitur me armë në Paris.
Detajet i ka zbuluar gazetari dhe biografi Jonathan Van Meter në librin e tij të ri “Citizen Kim: The Woman Who Created the Future”. Aty rrëfehet udhëtimi i Kardashianit me ish-bashkëshortin e saj, Kanye West.
Biografi i referohet producentes ekzekutive të emisionit “Keeping Up with the Kardashians”, Farnaz Farjam. Sipas saj, situata u përshkallëzua sepse West ishte bërë paranojak dhe dyshonte se dikush po përpiqej ta drogonte.
Libri thotë se reperi arriti t’i bindte policët vendas për dyshimet e tij. Si pasojë, ata ndërhynë të armatosur dhe kontrolluan dhomat e personave që ishin me çiftin.
Gjatë kësaj ndërhyrjeje, njëri nga policët dyshohet se ia ka drejtuar armën në kokë Kim Kardashianit. Situata përshkruhet si jashtëzakonisht e tensionuar.
Farjam, e shqetësuar për sigurinë e ekipit, vendosi të siguronte një avion privat për t’i larguar të gjithë nga vendi.
Kardashian dhe West kishin udhëtuar në Ugandë në tetor të vitit 2018. Atje ndanë atlete të markës Yeezy për fëmijët vendas dhe u takuan me presidentin e vendit, Yoweri Museveni.
Incidenti i pretenduar vjen dy vjet pas grabitjes në Paris, në tetor të vitit 2016, kur Kardashian u kërcënua me armë dhe u lidh nga persona të armatosur.
