Sektori minerar dhe lëndët e para kritike kanë potencial të rëndësishëm për ekonominë e Kosovës. Ato mund të tërheqin investime amerikane e ndërkombëtare dhe ta lidhin vendin me zinxhirët global të furnizimit. Kjo u theksua në një diskutim të organizuar nga Oda Ekonomike Amerikane në Kosovë, në bashkëpunim me Komitetin e Grave në Energji dhe Miniera.
Udhëheqësja e komitetit, Shqipe Vela, tha se pasuritë natyrore janë mundësi për zhvillim industrial, vende të reja pune dhe konkurrueshmëri më të madhe. Sipas saj, për ta shfrytëzuar këtë potencial duhen kuadër i qartë ligjor, politika të qëndrueshme dhe strategji afatgjate. Ajo theksoi edhe bashkëpunimin mes institucioneve arsimore dhe bizneseve për përgatitjen e fuqisë punëtore.
Kryetari i Komisionit për Ekonomi, Industri, Ndërmarrësi, Tregti dhe Inovacion në Kuvend, Arben Mustafa, tha se kërkesa globale për burime të sigurta të lëndëve të para hap mundësi të reja për Kosovën. Për ta kthyer potencialin në investime konkrete, sipas tij, nevojiten institucione funksionale, transparencë në vendimmarrje dhe heqje e pengesave burokratike. Ai premtoi rishikim të legjislacionit dhe adresim të barrierave për investitorët.
Zëvendësministrja e Ekonomisë, Triera Kasumi Berisha, tha se zhvillimi i sektorit duhet ta forcojë industrinë vendore dhe të rrisë përpunimin e lëndëve të para brenda vendit. Ajo e veçoi ndërmarrjen Trepça si aset strategjik dhe tha se modernizimi e menaxhimi më i mirë i saj janë thelbësorë. Ministria synon të avancojë vlerësimin e pasurive minerale, të shqyrtojë gazifikimin e qymyrit mbi baza fizibiliteti dhe të hartojë strategji të re minerare me të dhëna të besueshme gjeologjike.
Në emër të sektorit privat foli Mentor Demi, kryesues i Odës së Minierave të Kosovës dhe përfaqësues i kompanisë Western Tethyan Resources. Ai tha se sektori nuk po merr vëmendjen e merituar, edhe pse mineralet janë bazë e tranzicionit energjetik dhe e teknologjive të reja. Sipas tij, në Kosovë ende mungon kuptimi i plotë i rëndësisë strategjike të sektorit dhe i natyrës afatgjate të investimeve minerare.
