AUV ka vendosur ndalimin e përdorimit dhe tregtimit të 5,560 kilogramë misri me origjinë nga Serbia, pasi analizat laboratorike e konfirmuan se përmbajtja e aflatoksinit B1 tejkalon kufirin maksimal të lejuar.
Masat u zbatuan më 29 tetor 2026 ndaj tre subjekteve ekonomike: Agro Com Sh.P.K. në Fushë Kosovë (3,270 kg), Thermo‑1 Sh.P.K. në Prugoc të Prishtinës (1,040 kg) dhe NTP “Te Hysi” në Shtime (1,250 kg).
Aflatoksini B1 prodhohet nga disa lloje myqesh dhe mund të kontaminojë drithërat, veçanërisht misrin. Ekspozimi i zgjatur mund të shkaktojë dëme të mëlçisë dhe të rrisë rrezikun e zhvillimit të kancerit. Përmes ushqimit të kontaminuar për kafshë, toksina mund të konvertohet në aflatoksin M1 dhe të kalojë në qumësht, duke paraqitur kërcënim për shëndetin e konsumatorëve.
AUV ka thirrur fermerët, prodhuesit dhe tregtarët e ushqimit për kafshë të sigurojnë origjinën dhe gjurmueshmërinë e produkteve, të respektojnë kushtet e ruajtjes dhe të ndalojnë përdorimin ose tregtimin e misrit me nivel të tejkaluar aflatoksini. Ministria e Bujqësisë, Pylltarisë dhe Zhvillimit Rural ka konfirmuar se do të vazhdojë kontrollet zyrtare, analizat laboratorike dhe masat paraprake për të parandaluar qarkullimin e produkteve që rrezikojnë shëndetin e njeriut dhe kafshëve.
