Kosova ka shënuar humbje financiare prej 43.8 milionë eurosh nga Plani i Rritjes i Bashkimit Evropian. Shkaku i kësaj shume të humbur ka qenë mospërmbushja e gjashtë prej 13 hapave të reformave, afati i të cilave kishte skaduar në qershor, si pasojë e ngecjeve politike dhe shpërndarjes së Kuvendit.
Këtë e ka bërë të ditur koordinatori kombëtar për Planin e Rritjes dhe kryenegociatori i vendit me BE-në, Jeton Zulfaj, gjatë raportimit të tij para Komisionit për Integrim Evropian. Ai ka sqaruar se nga 13 hapat e paraparë për periudhën shtesë deri në qershor të këtij viti, vendi ka arritur t’i zbatojë shtatë prej tyre.
Zulfaj ka theksuar se vlera e përgjithshme e këtij plani për vendin arrin shifrën prej 882.6 milionë eurosh. Pjesa më e madhe e kësaj shume përbëhet nga kredi të lidhura me 111 hapa reformash, të cilat duhet të implementohen deri në fund të muajit gusht të vitit të ardhshëm.
Sipas tij, reformat e lëna anash përfshijnë fusha të rëndësishme, siç janë ligjet për energjinë dhe falimentimin, pakoja legjislative për drejtësinë, si dhe strategjia kundër krimit të organizuar. Ai ka shtuar se këto çështje janë rikthyer sërish në procedurë institucionale, me qëllim që të mos humbet asnjë prej reformave të kërkuara nga Brukseli.
