Një çështje e bujshme përgjimesh ka dalë në dritë në Serbi, ku Agjencia e Inteligjencës dhe Sigurisë (BIA) akuzohet se ka vëzhguar në mënyrë të paligjshme prokurorët që po hetonin korrupsionin lidhur me tragjedinë e stacionit hekurudhor në Novi Sad, ku humbën jetën 16 persona.
Sipas një investigimi të publikuar nga revista serbe Radar, shërbimi sekret ka përgjuar bisedat telefonike, mesazhet elektronike dhe madje edhe mbledhjet e brendshme të prokurorëve të Prokurorisë për Krimin e Organizuar. Kjo agjenci dyshohet se ka siguruar në këtë mënyrë informacione konfidenciale mbi planet hetimore dhe veprimet e ardhshme të organeve të drejtësisë.
Në qendër të kësaj mbikëqyrjeje ka qenë edhe drejtuesi i kësaj prokurorie, Mladen Nenadić. Hetimet e fshehta thuhet se janë autorizuar zyrtarisht mbi bazën e dyshimeve formale për spiunazh, ndërsa burimet e medias sugjerojnë se synimi i vërtetë ishte kontrolli mbi hetimet e korrupsionit të nivelit të lartë.
Masat e fshehta të vëzhgimit janë zbatuar gjatë periudhave të ndryshme të vitit, ndërsa u ndërprenë plotësisht në fund të muajit tetor, pak ditë pas përfundimit të zgjedhjeve në vend, përpara se një pjesë e mbikëqyrjes të rikthehej sërish.
